بعيداً عن السياسة).. رسالة الى (الحبوبة) و قبل أن تعودي من القاهرة

بقلم/صبري محمد علي (العيكورة)

العزيزة أم الكل علمت أنك قد عقدت العزم علي العودة للوطن (إستجابةً) لمناشدة السيد رئيس الوزراء

فقلتُ يا ولد …..
دعني أضعك في الصورة أمام الوضع الراهن أمامي لغرفتك (المُعتقة) اللهم لا شماتة

حتى لا تتحول العودة الى مأتم و مِحن وفضائح
(ونحن ما ناقصين يا حبوبة)!

أولاً الغُرفة بتاعتك على البلاط يا حاجة
وإن كُنتُ أحمد للسيد الشفشافي أن ترك لك الباب والشباكين و ستارة واحدة

أما (عِدة الجبنة) …!
فأحسن تغشي (العتبة) بالمرّة يا حاجة

الكُرسي الأحمر بتاعك داك يا حبوبة تتذكريهو؟
لما كُنتي تجلسي عليهو ولا كأنك (نفرتيتي) تمارسي من منصته سلطاتك المطلقة وتوقفي البيت كُلّو علي كراع واحدة!
الله يعوضك فيهو

(الكورية أم قعر) القلتي وارثاها من أمك وما بترضي فيها خمج كان قريييبة بتكون في (نيالا)

لا وكمان ما أنسى الطرحة الحمراء الكُنتي بتربطي بيها راسك من صداع الجبنة وتعلني حالة الطوارئ في البيت كُلّو لما تتأخر عن مواعيدها (٣٣) ثانية بس !
الطرحة الخطيرة ديك راحت يا حاجة (مخيّر الله)

السِّبح (الكُتار) الدارعاهن في كراع العنقريب وحات غلاوتك يا حبوبة و(لاااا) واحدة

العتود والغنمايتين
لا حس لا أثر إلا الجلد لقيناهُ مجدوع جنب باب جارتنا السُرّة بت عوض الله

أما حِلَلَ القُوز وجرادل الطير المهاجر الما نزلن الواطة من زمن عرس خالي البلولة
وحاتك ولااااا واحده

وشوفي يا حبوبة عشان ما تجي وتعمليها لينا مناحة

(السحارة)
بتاعتك الكاتبين ليك عليها تنتراً باللون الأحمر
(ممنوع الإقتراب والتصوير) تتذكريها !

يا حبوبة تتذكري لمن لقيتني واقف جمبها ساي وطبقتي فوقي كافة قوانين الأمم المتحدة والإتحاد الافريقي وحظرتني من دخول (القاطوع بتاعك) و وزعتي نشرة لكافة أفراد الأسرة تتذكري اليوم داك؟
الله يعوضك فيها
الدهيبات والحُق وعِدّة الجرتق الجُوّاها و الخرزة والحريرة وهلال ود الطهور وكل المحرمات علينا شوفتهن
لحسوهن يا حاجة !!

*أعزائي القراء*
حقيفة قصدت ذكر بعض هذه المُقتنيات كنماذج وقد تختلف حسب (إستايل) الحبوبة لكن قصدت من ذلك أن تُهيئوا حبوباتكم قبل العودة بحقيقة وضع مملكاتهن

حتى لايُصدمن وتظل كامل الأسرة مشغولة بعلاج الحبوبة هذا لو إمتصت الصدمة أصلاً

*كلّمتكم غايتو*
وعلي كيفكم

(صباحكو إششطة)

الأثنين١٩/يناير/٢٠٢٦م